2024ko txertaketa kanpaina

Honako arrisku-talde hauetako batekoa bazara:

"GRIPEAREKIN ETA COVIDAREKIN APUSTURIK EZ. JARRI TXERTOA"

Osakidetza hasi da arrisku-taldeei gripearen eta COVID-19aren aurkako txertoa jartzen. Taldeak hauek dira, funtsean.

SARTU WEB BIDEZKO ZITAN

COVID-19ari eta gripeari aurre egiteko txertaketa-kanpaina bateratua egingo da Euskadin.

"GRIPEAREKIN ETA COVIDAREKIN APUSTURIK EZ. JARRI TXERTOA" leloaren bidez, helburua da argi uztea txertaketa dela tresnarik eraginkorrena bi gaixotasun horiei aurre egiteko. Osakidetzak bi gaixotasunen aurkako txertaketa bikoitza eskainiko du zita berean arrisku taldeei.

Nola eskatu zita?

Arrisku-taldeetako pertsonei emango zaie lehentasuna:

  • Arrisku-talderen batekoa bazara, hartu zita eskatu hitzordua zure osasun-zentrora deituta, Osakidetzaren webgunearen bidez, edo 900 20 30 50 telefonora deituta.
  • Arriskuko taldekoa EZ bazara eta gripearen aurkako txertoa hartu nahi baduzu: itxaron azaroaren 4era arte. Eska dezakezu zita webgunearen bidez, osasun-zentrora deituta edo deitu 900 20 30 50 telefonora.

Babestu zeure burua!

Txertoa da birus biei aurre egiteko tresnarik onena. Hala ere, gripea eta beste arnas birus batzuk (hala nola COVIDa) prebenitzeko, kontuan izan neurri higieniko, erraz eta eraginkor hauek:

  • Sarritan garbitu eskuak, ura eta xaboia erabiliz.
  • Estali ahoa besoarekin eztula edo doministiku egitean.
  • Erabil itzazu botatzekoak diren zapiak.
  • Erabili maskara, batez ere sintomarik baduzu edo pertsona kalteberekin kontakturik baduzu.

Txertoak:

  • GRIPEA: txerto tetrabalentea, zirkulatzen ari diren gripearen birusen aurkako babes, segurtasun eta eraginkortasun handiagoa eskaintzeko.
  • COVID-19a: Omikron aldaeraren azpialdera berrietara egokitutako txertoa.

Informazio gehiago

COVID-19ari buruzko informazio gehiago: Osasun Sailaren webgunean

Ohiko galderak

Zer da gripea eta zein dira sintomak?

Gripea gaixotasun infekziosoa da, influentza birusak eragindakoa. Arnas sistemari eragiten dio batez ere (sudurra, eztarria eta birikak), eta erraz hedatzen da pertsona batetik bestera, normalean airearen bidez, norbaitek eztul edo doministiku egiten duenean.

Gripea duten pertsonek honako sintoma hauetako batzuk izaten dituzte maiz: sukarra, eztarriko mina, mukiak, eztul lehorra, zefalea, muskuluetako mina eta nekea. Kasu larriagoetan, bereziki aurretik osasun-arazoak zituzten pertsonen kasuan, gripeak konplikazioak eragin ditzake, hala nola pneumonia.

Zein dira inkubazio- eta kutsatze-aldiak?

Gripearen inkubazio-aldia, hau da, kutsatzetik sintomak agertu arteko denbora, egun 1etik 4ra bitartekoa izaten da. Kasu gehienetan, sintomak bigarren egunean agertzen dira.

Kutsatze-aldia sintomak agertu baino egun bat lehenago hasten da, eta 3-7 egun irauten du. Immunitate-sistema ahuldutak dituzten pertsonek edo haur txikiek denbora gehiagoz kutsa dezakete.

Nola zabaltzen edo transmititzen da gripearen birusa?

Gripearen birusa batez ere airearen bidez hedatzen da infektatutako pertsona batek eztul, doministiku edo hitz egiten duenean, birusa duten tanta txikiak askatuz. Kutsatutako gainazalak ukitzean eta, ondoren, eskuak ahora, sudurrera edo begietara eramatean ere kutsa gaitezke.

Nori gomendatzen zaio gripearen aurkako txertoa hartzea?

Gripearen aurkako txertoaren kanpainak konplikazioak izateko arriskurik handiena duten pertsonak eta infekzioa transmititzeko arriskua dutenak du helburu batik bat. Horregatik, txertaketa honako biztanle-talde hauetan gomendatzen da batez ere:

  • 60 urtetik gorakoei. Arreta berezia jarriko zaie egoitza itxietan bizi diren pertsonei.
  • 6 hilabetetik 60 urtera bitarteko pertsonen artean, gaixotasunen bat izateagatik konplikazioak izateko arrisku handia dutenei.
  • 6 hilabete eta 5 urte bitarteko haurrak.
  • Konplikazioak izateko arrisku handia dutenei gripea transmiti diezaieketen pertsonei: zaintzaileak, arrisku handiko pertsonekin batera bizi direnak.
  • Osasun-langileei eta langile soziosanitarioei, bai eta funtsezkotzat jotako zenbait talderi ere.

Txertoaren konposizioa

Kanpaina honetan, Osakidetzak gripearen aurkako txerto tetrabalente bat erabiliko du; horrek esan nahi du gripearen lau birus mota dituela (bi A motakoak eta bi B motakoak). Munduko Osasun Erakundeak denboraldi epidemiko bakoitzean behatu duenaren arabera hautatzen dira birus horiek.

Arrautzaz egindako txertoen konposizio-gomendioa da:

  • A/Victoria/4897/2022 (H1N1) pdm09 motako birus bat
  • A/Thailand/8/2022 (H3N2) motako birus bat
  • B/Austria/1359417/2021 (B/Victoria leinua) (eguneratu) birus mota bat
  • B/Phuket/3073/2013 (B/Yamagata leinua) birus mota bat

Aurten txertoa jarri badidate ere, gripea har dezaket?

Bai, litekeena da gripea harrapatzea, txertoa jarri badizute ere. Txertoak ez du babes osoa ematen, gripearen birusa urtero aldatzen delako eta txertoa denboraldi horretako andui ohikoenetarako egiten delako. Hala ere, txertoa hartzeak nabarmen murrizten du gaixotzeko arriskua, eta kutsatuz gero, sintomak arinagoak eta laburragoak izaten dira.

Era berean, litekeena da, txertoaren ondoren, gorputzak behar adinako erantzun immunitarioa ez garatzea, batez ere adinekoen edo sistema immunitarioak ahulduta dituzten pertsonen kasuan.

Zer onura ditu gripearen aurkako txertaketak?

Hainbat arrazoi daude urtero gripearen aurkako txertoa hartzeko:

  • Infekzioa prebenitzen laguntzen du, eta kutsatuz gero, sintomen larritasuna murrizten du.
  • Ingresurako arriskua murriztu egiten da, batez ere gaixotasun kronikoak dituzten pertsonen artean.
  • Haurdunaldian, ama, haurtxoa eta bularreko haurra babesten ditu bizitzako lehen hilabeteetan.
  • Komunitatea babesten laguntzen du, bereziki pertsona kalteberenak, birusaren hedapena mugatuz.

Zer albo-ondorio gerta daitezke gripearen aurkako txertoa hartu ondoren?

Euskadin erabiltzen den gripearen aurkako txertoa birus zatikatuen txertoa da, eta kontrako erreakzioak izateko probabilitate txikia du ezaugarri.

Beste txerto batzuekin bezala, txertoaren ondoren erreakzio lokalak gerta daitezke, eta, gutxiagotan, sukarra, ondoeza eta gorputzeko mina eragin ditzakete. Erreakzio horiek lehen 6-12 orduetan hasten dira, eta 1-2 egun irauten dute.

Urtero hartzen dut gripearen kontrako txertoa?

Urtero txertatu behar zara, gripearen birusak etengabe aldatzen direlako, eta, horren ondorioz, aurreko txertoen babesa ez da hain eraginkorra. Gainera, antigorputzek ematen duten immunitatea murriztu egiten da denborarekin, birusaren aurkako defentsa-ahalmena murriztuz.

Gripearen txertoa hartu ondoren, pertsona batzuek katarro-sintomak izaten dituzte. Zergatik gertatzen da?

  • Arnasbideetako birus ugari daude (errinobirusa, arnas birus sintzitiala, parainfluenza birusa, adenobirusa..), gripe-denboraldian zehar zabaltzen dira eta gaixotasuna eragiten dute. Txertoak ez du birus horietatik babesten.
  • Txertoa jasotzen denetik, bi aste behar dira gorputza gripetik babestuta egoteko. Batzuetan, denbora tarte horretan gripeaz kutsa daiteke, txertoa jarrita izan arren.
  • Pertsona batzuk gripearen birus batekin infektatu daitezke, txertokoak ez direnak, edo baliteke behar bezala babestuta ez geratzea, adinagatik edo osasun-egoeragatik.

Zer kasutan dago kontraindikatuta txertoa?

  • 6 hilabetetik beherako haurrak.
  • Txertoaren printzipio aktiboei edo osagairen bati alergia dieten pertsonak.
  • Lehenago gripearen aurkako txertoaren aurrean erreakzio alergiko larria izan duten pertsonak.
  • Sukarra edo infekzio akutu bat duten pertsonak: txertoa atzeratu egin beharko da sendatu arte.

Gripea eta COVIDa eduki ditzaket aldi berean?

Bai, gripea eta COVID-19a aldi berean har daitezke; birus desberdinek eragindako arnas gaixotasunak dira biak.

Gripearen eta COVID-19aren sintoma batzuk antzekoak dira; beraz, zaila izan daiteke bi gaixotasunak bereiztea sintomak soilik kontuan hartuta. Diagnostiko-probak lagungarriak izan daitezke norbaitek influenza ala COVID-19a duen zehazteko.

Gripearen eta COVIDaren arteko antzekotasunak eta ezberdintasunak

Gripea eta COVID-19a arnas gaixotasun kutsakorrak dira, baina birus ezberdinek eragiten dituzte. COVID-19a SARS-CoV-2 birusak eragiten du, eta gripea, berriz, influentzaren birusak.

Bi gaixotasunek antzeko sintomak dituzte, hala nola sukarra, eztula eta nekea, eta horrek zaildu egin dezake sintomatologiarekin soilik bereiztea.

Jaso al ditzaket aldi berean gripearen aurkako txertoa eta COVID-19aren aurkako txertoa?

Bai. COVID-19aren aurkako dosi bat ematea gomendatzen den taldeetako batekoa bazara, eta urtaroko gripearen aurkako txertoa ere gomendatzen badizute, bi txertoak jar ditzakezu zita berean. Bi txertoak leku anatomiko desberdinetan emango dira.

Ez ditut bi txertoak batera jarri nahi. Txerto bakoitzerako zita bana izan dezaket?

Bai, bereiz jaso daitezke, baina ez dago kontraindikaziorik egun berean jasotzeko, eta ez dituzte kontrako erreakzioak areagotzen. Gainera, abantaila bat da zuretzat, zentrora behin bakarrik joan behar duzulako.

Txertoek ematen duten babesa berehalakoa da?

Ez. Txertoa hartu ondoren, gorputzak bi aste behar ditu, gutxi gorabehera, gripeari eta COVID-19ari aurre egiteko behar diren antigorputzak sortzeko. Horregatik, onena da birusak zirkulatzen hasi aurretik txertoa hartzea.

Sukarra daukat. Txertoa jarri ahal dut?

Gaixotasun akutu larri edo sukarra eragiten duen prozesu akuturen bat dutenen kasuan, txertaketa atzeratu egin behar da aldi baterako; baina sukarrik gabeko edo erasan sistemikorik gabeko gaixotasun arina ez da baliozko arrazoia txertaketa atzeratzeko.

Esteka honetan, COVIDaren aurkako txertaketari (Euskadin) buruzko informazio guztia duzu:

https://www.euskadi.eus/covid-19aren-aurkako-txertaketaren-inguruko-galderak-eta-erantzunak/web01-a3txerto/eu/

Gaur egun, nori dago zuzenduta COVID-19aren aurkako txertoa?

COVIDaren aurkako txertaketa talde hauentzat da:

  • Adina: 60 urtetik gorakoak.
  • Arrisku-baldintzak dituzten 6 hilabete eta 59 urte bitarteko pertsonak.
  • Gomendatuta dago, halaber, osasun-zentro, -zerbitzu eta -establezimenduetako langileentzat, bai lehen mailako arretakoentzat, bai ospitale-arretakoentzat, publiko zein pribatuentzat, bai pazienteekin harremanetan dauden osasun-larrialdietako zerbitzuetan lan egiten dutenentzat, bai eta adinekoen egoitzetako edo desgaitasuna dutenentzako arretako langileentzat ere.

Eta arrisku-talde horietako kide ez banaiz eta txertoa jarri nahi badut, jar dezaket?

Zure osasun-profesionalarekin kontsultatu behar duzu, zure egoera balora dezan.

Zergatik jarraitzen dugu gomendatzen pertsona zaurgarriei txertoa jartzea?

Oraindik ere birusak aldaera berriak dituelako eta pertsona zaurgarrienek infekzio larriagoak izateko arrisku handiagoa dutelako, adinagatik edo oinarrizko gaixotasunagatik.

Nola eskatu zita?

60 urtetik gorakoei eta arrisku-taldeetakoei COVIDaren aurkako txertoa eskainiko zaie gripearen aurkako txertoa jartzen zaien unean bertan; beraz, ez da zitarik eskatu behar.

Edozein arrazoi dela medio, COVIDaren aurkako txertoa soilik hartu nahi duten pertsonek beren osasun-zentrora deitu behar dute, edo 900 20 30 50 telefonora (1. aukera).

Ez dut gizarte segurantzarik. MUFACE, MUGEJU, ISFAS, desplazatuak... Zer egin behar dut? Nola zitatuko naute?

Osakidetzako OTIrik ez baduzu, deitu osasun-zentrora edo 900 20 30 50 telefonora (1. aukera).

Zer txerto emango da aurten?

Medikamentuen Europako Agentziak (EMA) eta Osasun Publikoko Batzordeak birusaren aldaera berrietara egokitutako txertoak gomendatzen dituzte, aurrez emandako txerto mota edozein dela ere.

Osakidetzak une horretan eskuragarri dagoen txertoa eskainiko du.

Zenbat denbora igaro behar da aurreko txertoetatik?

Dosi hori jasotzeko, gutxienez 3 hilabeteko tartea igaro behar da hartutako azken txerto-dositik.

Duela gutxi COVIDa izan badut, txertoa har dezaket?

Gutxienez 3 hilabeteko tartea igaro behar da, aurretiko infekzioren bat izan duzunetik.

Ez dut COVIDaren aurkako txertoa hartu. Zenbat dosi jarri behar ditut orain?

Aurretiko dosi kopurua alde batera utzita, 60 urte edo gehiago baditu edo arrisku-talderen bateko kide bada, gaur egun txerto-dosi bakarra gomendatzen da.

Immunodeprimitutako pertsonek COVID-19aren aurkako txertoaren dosi bat gehiago ematea eska dezakete.

Zer txerto emango zaie haurrei?

Pfizer laborategiaren txerto pediatriko espezifiko bat adin-talde horretarako, helduentzako txertoak baino dosi txikiagoa duena.

Zer albo-ondorio izan ditzaket txertoa jartzen badut?

Medikamentu guztiek bezala, txertoak albo-ondorioak eragin ditzake. Efektuok ez dira beti agertzen, eta gehienak arinak eta iraupen laburrekoak izaten dira (besteak beste, sukarra edota injekzio-lekuko mina).

COVID-19aren sintomak baditut, txertoa jar dezaket?

Diagnostikoa baztertu arte itxaron behar duzu. COVID-19ak eragindako infekzioa dela baieztatzen bada, ez da txertaketa gomendatzen 3 hilabete igaro arte.

COVID-19a duen pertsona baten kontaktu estua banaiz, txertoa jar dezaket?

Sintomarik ez baduzu, txertoa jar dezakezu. Ez da gomendatzen test diagnostiko birologiko edo serologikorik egitea txertaketa baloratzeko.

Zergatik da garrantzitsua gripearen aurkako txertoa haurtzaroan?

Izan ere, gripeak etengabeko mehatxua izaten jarraitzen du, eta mundu osoko 5 urtetik beherakoen artean milioi bat gripe-kasu larri eragiten ditu urtero. Gripea duten haurrak kutsadura-iturri garrantzitsuak izan ohi dira (aitona-amonentzat, beste adinekoentzat, bizikideentzat...), eta osasun publikoko arazo garrantzitsu bat dira, ondorio sozioekonomiko garrantzitsuak dituena. Txertoa da gaixotasun horren aurkako prebentzio-neurri eraginkorrena.

Beste herrialde batzuetan ere gomendatzen al da gripearen aurkako txertoa jartzea 5 urtetik beherakoei?

2012. urteaz geroztik, Osasunaren Mundu Erakundeak eta Gaixotasunak Prebenitzeko eta Kontrolatzeko Europako Zentroak (OME, ECDC) 6 eta 59 hilabete arteko biztanleak sartu zituzten gripearen aurkako txertoa jartzeko lehentasun-taldean. Europako beste herrialde batzuek ere (Austria, Danimarka, Finlandia, Irlanda, Italia, Erresuma Batua, etab.) gripearen aurkako urtaroko txertaketa unibertsala ezarri dute adin-talde horretan.

Espainian, Txertaketen Programa eta Erregistroaren Ponentziak gomendioen dokumentu espezifiko bat prestatu du 6-59 hilabeteko pediatriako populazio osasuntsuari gripearen aurkako txertoa jartzeari buruz. Osasun Publikoko Batzordeak onartu du, eta hemen kontsulta daiteke: Recomendaciones de vacunación frente a la gripe en población infantil

Zein da gripearen txertaketak arriskuko haurrengan duen garrantzia?

Arrisku-taldeak lehentasun bat diren arren, talde horietako haur eta nerabe askok oraindik ez dute jaso, hainbat arrazoirengatik, urteko txertaketa hori, ezta haien bizikideek ere. Azterlan batzuek erakusten dutenez, Espainian, oinarrizko gaixotasunak dituzten haurren txertaketa-estaldurak ez du, oro har, % 20 gainditzen, eta gripeagatik ospitalizatutako arrisku-faktoreak dituzten haurren laurdenak soilik hartu du gripearen aurkako txertoa. Jakin badakigu, halaber, zaila dela txerto-estaldura handiak izatea pediatrian, haurren txertaketa unibertsala ezarrita ez dagoen herrialdeetan.

Zein da haurren arrisku globala urteko epidemietan?

Urteko gripe-epidemiek eragindako haurren proportzioa % 5etik % 35era bitartekoa da oro har, eta % 50etik gorakoa da biztanle-talde itxietan, hala nola eskola-giroan. Adingabeak, bestalde, gaixotasuna transmititzeko bektore nagusia dira.

Zergatik da garrantzitsua haurren txertaketa unibertsala 6 eta 59 hilabete bitartean?

Arrisku-taldeetan sartuta ez dauden 6 hilabetetik gorako haurren gripearen aurkako txertoa prebentzio-neurri gomendagarria da, haurrari banakako babesa ematen diolako eta familia- eta komunitate-babesa errazten duelako. 6 eta 59 hilabete bitarteko haurrei gripearen aurkako txerto unibertsala gomendatzeko ebidentzia zientifiko nahikoa dago, eta horretarako osasun-agintariek haurren txertaketarako emandako gomendio ofizialetan txertatu da.

Zein dira gripearen aurkako txertaketaren gomendio orokorrak haur eta nerabeei dagokienez?

  • 6 eta 59 hilabete bitarteko haur guztiak.
  • Arrisku-taldeak: egoera jakin batzuetan dauden edo gripearen konplikazioak izateko arrisku handiagoa dakarten oinarrizko gaixotasunak dituzten 6 hilabetetik gorako pertsonak.
  • Arriskuko pazienteekin bizi diren 6 hilabetetik gorako pertsonak.
  • 5 urtetik gorako pertsonak desgaitasunak dituztenen zentroetan edo egoitzetan itxietan bizi direnak.
  • Haurdun daudenak, bai beren burua babesteko, bai etorkizunean izango duten haurra babesteko, haurdunaldiaren edozein unetan.

Zer gomendio dago lehentasunezko talde horietatik kanpoko haurren txertaketari buruz?

Gainera, arrisku-taldeetan sartuta ez dauden 5 urtetik gorako haurrei gripearen aurkako txertoa jartzea neurri gomendagarria da, prebentzio-jarduera horrek banakako babesa ematen baitie haurrei eta nerabeei, eta familia- eta komunitate-babesa errazten baitu.

5 urtetik gorako haur osasungarriek txertoa jaso ahal izango dute, gurasoek edo tutoreek haien osasun-profesionalarekin kontsultatuta. Zita urriaren 30etik aurrera eskatu ahal izango dute.

Gripearen aurkako zer txerto-mota gomendatzen da?

6 eta 23 hilabete bitartean baimendutako muskulubarneko txerto inaktibatua. Kanpaina honetan Fluarix txertoa daukagu.

24 eta 59 hilabete bitarteko haurrei sudurreko txerto indargetua emango zaie, kontraindikaziorik ez badago. Eskuragarri dagoen txertoa Fluenz da.

Fluenz Intranasal da 24 eta 59 hilabete bitartekoentzako aukerako txertoa. Kontraindikaziorik balego, Fluarix® muskulubarneko txertoa jar daiteke.

Nola jartzen da gripearen txertoa eta zenbat dosi behar dira?

Txerto injektagarri inaktibatua muskulu barneko injekzio baten bidez ematen da izterrean edo besoan, haurraren adinaren arabera.

Sudurraren bidezko txerto indargetua sudur-lainoztatzearen bidez ematen da, eta dosiaren erdia sudur-hobi bakoitzean ematen da.

Haurrei gripearen aurkako txertoaren dosi bakarra emango zaie, arrisku-egoeraren bat duten eta gripearen aurkako txertoa lehen aldiz hartzen duten haurrei izan ezik. Kasu horretan, txertoaren bi dosi jasoko dituzte, elkarren artean 4 asteko tartea utzita.

Gripearen aurkako txertoa beste txertoekin batera eman daiteke?

Bai. Txerto injektagarri inaktibatuaren kasuan, beste txerto batzuekin batera jar daiteke, baina injekzioa jartzeko leku desberdinak hautatuta.

Sudurreko txerto indargetua beste txerto indargetu parenteral batzuekin batera eman daiteke, eta ez da beharrezkoa haiekin tarterik gordetzea, egun berean ematen baitira.

Haur batek gripearen aurkako txertoa hartu behar al du denboraldi honetan jada jarri badu?

Bai. Gripearen aurkako txertoa gomendatuta dago oraindik, infekzioa izan arren. Gripearen birusa hainbat hilabetez ibil daiteke, eta gripe-denboraldian zehar hainbat gripe-koadro izan ditzake. Horregatik, txertoa hartzea da babesik onena.

COVIDa izan duten haurrek gripearen aurkako txertoa har al dezakete?

Ez da ezagutzen COVID-19a gainditu duten pertsonei txertoa jartzeko kontraindikaziorik. Era berean, COVID-19ak eragindako infekzio aktiboa duten adingabeei gripearen aurkako txertoa ematea gomendatzen da, eta nahikoa da txertoa egun batzuetan atzeratzea koadro klinikoa bidali arte.

Zer neurri hartu behar dira haurtzaroko gripearen aurkako txertaketari dagokionez?

  • Sukar-gaixotasuna edo prozesu akutu ertaina edo larria. Kasu horretan, sendatu arte atzeratuko da.
  • Guillain Barré-ren sindromea gripearen aurkako aurretiko txertaketaren ondorengo sei asteetan (ez txertatu haur osasuntsua bada; baloratu banan-banan arrisku-faktore espezifikoak dituzten haurrak).
  • Purpura tronbopeniko immunea gripearen aurkako txertoaren aurretiko dosi baten ondorengo 7 egunetan.
  • Alergia larria arrautzari.

Zer kontraindikazio daude haurtzaroan gripearen aurkako txertoa jartzeko?

Gripearen aurkako txertoa kontraindikatuta dago pazienteak gripearen aurkako txertoarekiko erreakzio alergikoaren aurrekaria badu.

Fluenz sudurreko txertoaren kontraindikazio espezifikoak hemen kontsulta daitezke.Fluarix txertoaren kasuan, kontraindikazioak hemen kontsulta daitezke.

Zeintzuk dira gripearen aurkako txertoaren ondorio kaltegarriak?

Gripearen aurkako txertoa oso segurua da. Albo-ondorioak beste txerto injektagarri batzuetan ohikoak direnak dira, batez ere tokian tokikoak (mina eta gorritzea injekzio-tokian) edo orokorrak arinak (sukarra, ondoeza...). Beste erreakzio mota batzuk salbuespenezkoak dira.

Berehalako erreakzioen aurreko arreta-neurri gisa, injektagarri bat ematen den bakoitzean, 20 minutu eman behar dira txertaketa-zentroan.

Haurdun banago, txertoa hartu behar dut?

Haurdunen gripearen eta COVIDaren aurkako txertoa jartzea gomendatzen da, haurdunaldiaren edozein hiruhilekotan, hiru ondorio eragiten baititu:

  • Ama babesten du.
  • Jaioberria babesten du.
  • Haurra babesten du bere bizitzako lehen hilabeteetan.

Noiz gomendatzen da gripearen aurkako eta Covid-aren aurkako txertoa?

Haurdunen guztiei gomendatzen zaie COVID-19 txertoa eta gripearen aurkakoa. Bi txertoak haurdunaldiaren edozein hiruhilekotan eman daitezke.

Bi txertoek haurtxoa babesten lagunduko dute infekzio horien aurkako bizitzako lehen hilabeteetan. Gainera, haurduna ere babesten du, haurdunaldia arrisku-faktorea baita bi infekzioengatik forma larriak izateko.

Noiz jar dezake txertoa haurdun batek Covidaren aurka?

COVID txertoa jar dezake aurreko haurdunaldietan jarri arren, edo nahiz eta COVID txerto bat edo batzuk jarri izan haurdunaldia baino lehen.

Duela gutxi dosi bat jaso badu, gutxienez 3 hilabete igaro behar dira COVID txertoa jartzeko.

COVID txertoa ere jar daiteke, nahiz eta haurdunaldiaren aurretik edo bitartean COVID infekzio bat edo batzuk izan. Azken infekzioa berriki gertatu bada, gutxienez 3 hilabete igaro behar dira COVID txertoaren dosia jasotzeko.

Segurua al da gripearen aurkako txertoa haurdunaldian?

Bai, gripea eragin ezin duen txertoa da, eta segurua da haurdunaldian.

Hala eta guztiz ere, txertoek, beste edozein sendagaik bezala, kontrako ondorioak izan ditzakete. Eragin horiek ez dira oso ohikoak, eta arinak izaten dira (ziztadaren zonako eragozpenak), eta ez dute eraginik haurraren osasunean.

Zein kasutan daude kontraindikatutak gripearen eta Covidaren aurkako txertoak?

  • Txertoaren printzipio aktiboei edo osagairen bati alergia dieten haurdunak.
  • Lehenago gripearen aurkako txerto batekiko erreakzio alergiko larria izan duten haurdunak.
  • Sukarra edo infekzio akutu bat duten pertsonak: txertoa atzeratu egin beharko da sendatu arte.

Haurdunaldi bakoitzean gripearen aurkako txertoa eman behar da?

Bai. Haurdunaldi bakoitzean beharrezkoa da gripearen aurkako txertoa jartzea, bi arrazoirengatik:

  • Gripearen birusek gaitasun handia dute beren azaleko antigenoak aldatzeko (birusak infektatzeko duen gaitasunean garrantzi berezia duten proteinak). Aldaera horien ondorioz, gripearen birus berriak agertzen dira, eta gizakiak ez du birus horietarako babesik. Horregatik, txertoa urtero eguneratu behar da.
  • Gainera, denborarekin, txertoari esker sortzen diren antigorputzak gutxituz doaz.

Posible al da kukutxeztularen eta gripearen aurkako txertoa hartzea egun berean?

Bai, bi txertoak jartzeko unea bat badator, bisita berean jar daitezke, baina bakoitza beso batean. Egun desberdinetan ere jar daitezke, denbora-tarte jakin bat gorde beharrik gabe.

Gripearen eta Covidaren aurkako txertoak bularra ematen ari diren emakumeei jar dakizkieke?

Bai, gripearen aurkako txertoa bularra ematen duten emakumeei jar dakieke. Txertaketak ez dio eragiten esnearen ekoizpenari, eta defentsak transferitu diezazkioke haurrari, antigorputz eta esnetik igarotzen diren beste substantzia batzuen bidez.

Izan ere, txertaketa-kanpaina indarrean dagoen bitartean, erditu ondorengo lehen 6 hilabeteetan gripearen aurkako txertoa jartzea gomendatzen da.

Azken aldaketako data: