BGBK

Sintomak

• Nekea edo itolarria (disnea), ariketa fisikoa areagotzean nabaritu daitekeena. Denborarekin, atsedenean ere sentitzera irits gaitezke.
• Eztula eta/edo espektorazioa zein karkaxak ere izan ditzake pertsonak, batez ere goizetan. Arnas infekzioak izan ditzakete maiz.

 

Zer egin dezaket neure burua zaintzeko?

Bizi-ohitura osasungarriak izatea

• Elikadura:
  • Gatz gutxi eta likidoak neurriz.
  • 4-5 otordu arin egunean. Otordu oparoen ondorioz, urdaila bete egiten da, eta birikek espazio gutxiago dute hedatzeko.
  • Gasik edo astuntasun-sentsaziorik ez izateko, astiro mastekatzea, eta ez hartzea arazo horiek eragiten dituen elikagairik.
• Pisu egokia mantentzen saiatzea. Gehiegizko pisuaren eta argaltasun muturrekoaren ondorioz, gehiago kostatzen da arnasa hartzea. Muskulatura on batek ariketa fisiko erregularra eta birika-gaitasuna mantentzen lagunduko dizu.
• Kontsultatu zure kasu zehatzerako egokia den ariketa fisikoaren maila eta mota. Hasteko, 15 minutuz lauan ibil zaitezke, eta egunean 5 minutu luzatu, egunean 30 minutu inguru egitera iritsi arte.
  • Ez egin baraurik edo otorduen ostean.
  • Hotz edo hezetasun handiegiko egoeretan egiten bada, bronkioak uzkurtu eta arnasa hartzeko zailtasunak sor daitezke. Gertatzen bazaizu, erabili erreskateko inhalagailua.
• Kutsadura- edo ke-maila handiko lekuetan, erabili babes-neurriak, hala nola maskara.

 

Agindutako medikazioa hartzea 

Medikamentu gehienak inhalatu egiten dira dira (esprai, kapsula hautsa). Horrela, biriketara zuzenean iristen dira eta albo-ondorio gutxiago eragiten dituzte.

Inhalagailuak behar bezala erabiltzeak nahi den efektua lortzen lagunduko dizu: Horien erabilerari buruzko zalantzarik izanez gero, galdetu erizainari. Hau izango duzu:

• “Ohiko tratamendua”, aldian-aldian hartzen dena, preskripzioaren arabera, eta egoera egonkor mantentzen laguntzen duena.
• "Erreskate-tratamendua", nekea arindu behar duzun uneetan erabiltzen dena (salbutamola, terbutalina...).

Albo-ondorioak eragin ditzakete: dardara, karranpak, takikardia, buruko mina, hipergluzemia, ahoko lehortasuna... sintoma horietakoren bat baduzu, kontsultatu erreferentziazko osasun-profesionalarekin.

Oxigenoterapia

Gaixotasunak aurrera egiten duenean, baliteke arnastutako airea nahikoa ez izatea oxigeno-maila egokiari eusteko. Egoera horretan, oxigeno-tratamendua hasi ohi da, epe luzera sintomak eta biziraupena hobetzeko. Zure erreferentziazko osasun-taldeak behar duzun informazio guztia emango dizu.