Gomendio baliagarriak goragalea eta gorakoak tratatzeko

Zer dira goragaleak eta gorakoak? Zerk eragiten ditu?

Goragalea botaka egiteko gogoa da. Gorakoa urdaileko edukia ahotik bortizki botatzea da.

Kausa ohikoenak hauek dira: egoera txarrean dauden elikagaiak hartzea, bertigoak edo zorabioak izatea (autoan, autobusean, itsasontzian), medikamentu jakin batzuk hartzea (kimioterapia), migrainak, alkohola edatea, haurdunaldia edo errefluxua izatea, marihuana gehiegi kontsumitzea, elikagaiekiko alergia, min handia (giltzurruneko kalkuluak, etab.) eta hesteetako buxadura.

Nola arindu ditzaket sintomak?

Gorakoaren ostean, itxaron ordubete ezer hartu aurretik. Hasi zurrupada txikiak hartzen 10-15 minuturik behin, eta, gorputzak hori onartzen badu, areagotu maiztasuna eta kantitatea. Hala ez bada, errepikatu berriro prozesua ordubete igarotakoan.

Hasi anoa txikiak hartzen, 5-6 otordu egunean; ez da gomendatzen baraualdi luzeak egitea. Saiatu gustuko dituzun elikagai bigun eta leunak hartzen: arroz egosia, arroz-krema azenario-urarekin, ogi zuria, pasta zuria, hegazti-haragia, zopak. Saihestu elikagai oso koipetsu, astun eta pikanteak.

Haurdun bazaude eta goizetan goragaleak badituzu, jan zer edo zer solidoa jaiki aurretik (hala nola ogi txigortua).

Gogoratu atseden hartzea eta jarduera fisikoa murriztea.

Baliteke deshidratazioa konplikazio bat izatea. Saihesteko, ziurtatu behar adina likido hartzen duzula. Behar duzun likido kantitatea galdutakoaren araberakoa izango da; egunean 2-3 litro hartzea gomendatzen da. Honela har dezakezu:

• Ura: limoi-zukua gehi dakioke.
• Infusioak eta saldak.
• Arroz-ura: jarri irakiten litro bat ur eta arroz-eskukada bat, hogeita hamar minutuz. Iragazi eta utzi hozten hartu aurretik. (Kontserbazioa: 24 h hozkailuan)
• Azenario-ura: arrozaren prestaketa berdintsua. (Kontserbazioa: 24 h hozkailuan)
• Ahotik hartzeko seruma, etxean egina. Nahastu: (Kontserbazioa: 24 h hozkailuan)
  • Litro bat ur
  • Bi koilarakada azukre
  • Koilaratxo erdi gatz
  • Koilaratxo erdi bikarbonato
  • Katilu bat limoi-zuku
• Ahotik hartzeko seruma, farmazian erositakoa.
• Esnea, ahal dela jogurt natural moduan.
• Saihestu edari alkoholdunak edo gasdunak.
• Oro har, jarduera fisiko bizian gatz mineralak eta ura berritzeko hartzen diren edariak onenak ez badira ere, nahikoa izan litezke pertsona osasuntsuentzat.

Nola saihestu kutsatzeak?

Indartu higiene-neurriak. Eskuak maiz garbitzea da prebentzio-neurririk eraginkorrena, bai gorakoak dituen pertsonarentzat, bai bizikideentzat. Gogoratu eskuak garbitzea elikagaiak manipulatu edo jan aurretik, komunera joan aurretik edota pixoihalak aldatu aurretik...

Horrez gain, garbitu frutak eta barazkiak eta ziurtatu arrautzak, haragiak eta arrainak ondo eginda daudela. Zaindu elikagaien kontserbazioa. Ez edan edangarritasun-bermerik ez duten leku naturaletako urik.

Zaindu higiene-neurriak kutsatzeak saihesteko