Nola zaindu eta lagundu
Diabetesa duten pertsonek gaixotasunaren kontrola hobetzen dute hurbileko pertsonek babesten, zaintzen eta laguntzen dituztenean. Gaixotasun kroniko bat duen pertsona bat zaintzeko eta hari laguntzeko, behar duen garrantzia eman behar zaio, eta bere osasun fisikoan eta emozionalean zentratu behar gara.
Garrantzitsua da zaintzaileak honako hau jakitea:
- Zer den diabetesa.
- Pisua kontrolatzearen garrantzia, elikadura osasungarria izatearen eta ariketa fisikoaren bidez.
- Tabakorik eta alkoholik ez kontsumitzeko beharra.
- Glukometroa erabiltzea odoleko glukosa-mailak ezagutzeko.
- Medikazioa nola hartzen den edo nola injektatzen den intsulina.
- Zeintzuk diren konplikazio ohikoenak eta horien aurrean nola jokatu.
- Behar izanez gero, zer osasun-baliabidetara jo daitekeen.
Haurrak eta nerabeak
Diabetesa haurtzaroan edo nerabezaroan agertzen denean, familia da ikaskuntza- eta laguntza-iturri nagusi gaixotasunarekin bizitzen jakiteko. Izan ere, etapa horietan irakasten diren ohiturek eragina izango dute helduaroan. Horregatik, garrantzitsua da familia osoak honako hauek eskuratzea:
- Gaixotasunari, haren kontrolari eta tratamenduari buruzko ezagutzak.
- Odoleko glukosa-mailak mantentzen laguntzeko beharrezkoak diren ohitura osasungarriak, helburu gisa ezarritakoak.
- Diabetesa beste bizi-esperientzia bat gisa integratzeko jarrera eta ikuspegi positiboa, gozatzen jarraitzearekin bateragarria dena. Horrek familia osoarentzat onuragarriak diren ohiturei eusten lagunduko digu.
Komenigarria da, halaber, eskolako eta hezkuntza-komunitateko irakasleek ulertzea zer den diabetesa, ezagutzea zeintzuk diren tratamenduaren berezitasunak eta zeintzuk diren diabetesa pertsonaren errutinak, bai eta larrialdi-egoeretan azkar eta zehaztasunez erantzuten jakitea ere. Horrela, diabetesa duen haurra eskolan integratzea eta gizarteratzea erraztu ahal izango dute, egoera normalizatuz eta gainerako ikasleen arteko uste faltsuak ezabatuz (diabetesa kutsakorra dela, adibidez).
Zahartzaroa
Bizitzaren etapa honetan, prebentzioak garrantzi handiagoa hartzen du; izan ere, gaixotasuna hasten denetik igarotzen den denbora, berez, konplikazioak garatzeko arrisku-faktore bat da.
Adibidez, hipogluzemia- eta hipergluzemia-egoerak oharkabean pasa daitezke, azaltzen diren sintomak ez baitira ohikoak. Gainera, hipogluzemiak erorikoak, hausturak eta dementzia izateko arriskua eta, ondorioz, ospitaleratzeen kopurua areagotzen du.
Beraz, zaintzailea eta bizikideak funtsezkoak izango dira bai konplikazioak eta istripuak prebenitzeko, bai bizi-kalitate egokia izatea ahalbidetuko dioten bizi-ohitura osasungarriak sustatzeko.
Azken aldaketako data: