Osasun emozionala

Ohitura osasungarriak bizi-kalitatea hobetzeko egunerokotasunean gauzatzen diren jokabideak dira. Praktika horiek eragin positiboa dute ongizate fisikoan, psikologikoan eta sozialean.

Hona hemen bizi-ohitura osasungarrien adibide batzuk:

• Dieta orekatua eta osasungarria izatea.
• Ondo lo egitea.
• Ariketa fisikoa erregulartasunez egitea.
• Gorputzaren eta hortzen higiene egokia mantentzea.
• Gizarte-harreman gogobetegarriak izatea.
• Zaindu zure osasun emozionala.
• Saihestu ohitura toxikoak: tabakoa, alkohola, drogak eta osasunerako kaltegarriak diren beste substantzia batzuk.

Pertsona batzuek alkohol gehiago hartzen dute ondoeza gutxitzen saiatzeko. Hasieran ondorio lasaigarriak edo euforizatzaileak eragin baditzake ere, gero antsietate- eta depresio-sintomek okerrera egin ohi dute.

Gehiegizko edo ohiko kontsumoak arriskuak ekar diezazkieke osasunari eta besteekiko harremanei. Zenbat eta gehiago edan, hainbat eta arrisku handiagoa. Halere, egoera jakin batzuetan edozein kontsumo hartzen da arrisku handikotzat (haurdunaldia, ibilgailuak gidatu aurretik, adingabeak, beste osasun-arazo batzuk dituzten pertsonak...). Hala bada zure kasua, saiatu arrisku txikikotzat jotzen diren kontsumo-mailak ez gainditzen. Osasunaren Mundu Erakundeak azpimarratzen duenez, alkoholaren kontsumoan ez dago zero arrisku-mailarik: "Zenbat eta alkohol gutxiago, hobe".

Alkohola eta osasuna

"Poz partekatua bikoitza da eta zigor partekatua erdia da"

Familia- eta gizarte-ingurunearekin ditugun harremanak gure ongizatearen zutabe dira; are gehiago kezka edo bizipen desatseginen une hauetan. Isolamenduaren eta laguntza eskasaren ondorioz, osasuna okertu ez ezik, ondoeza eta desordena emozionalak izateko arriskua ere areagotzen da.

• Bilatu eta eman gizarte-babesa. Norbere burua egokitzeko baliabide bat da.
• Partekatu denbora zure bizitzako pertsona garrantzitsuekin, hala familiarekin, nola lagunekin. Tristurari, estresari edo beldurrei aurre egiteko tresna bat da.
• Parte hartu gizarte-jardueretan. Plazer iturri handia dira.
• Gaizki pasatzen ari bazara, hitz egin konfiantzazko norbaitekin eta partekatu nola sentitzen zaren; "aireztapen emozionalak" ondoeza hobetzen du.

Denborak urrea balio du. Aprobetxa ezazu!

Errutina aktiboa eraikitzeak apatia eta gogo eza kontrolatzen laguntzen du. Eguna planifikatzea eta pasibotasuna saihestea lagungarriak dira motibaziorako, norberaren gogobetetasunerako eta produktibitaterako. Hona hemen ideia batzuk:

• Antolatu eguneroko zereginak. Sortu zure beharrak, erantzukizunak eta gustuko duzuna jasotzen dituen errutina bat.
• Saihestu sedentarismoa eta ez utzi zereginik bertan behera. Egitekoak atzeratzeak ahalegin bikoitza eskatzen du.
• Aurkitu entretenimendu- eta gozamen-jarduerak.
• Egin zeregin errealisten zerrendak eta bete bertan jasotakoa.
• Banatu helburu txikitan zeregin handiak edo zailtasun handikoak. Hobetu zure gaitasunei buruz duzun sentsazioa.
• "Egin beharko nuke" esan beharrean, aukeratu egin ditzakezun eta bete nahi dituzun zereginak.

Antolatu eguna

Nolabaiteko urduritasuna edo kezka sumatzea onargarria izan daiteke. Antsietatea sentsazio normala da. Arrisku- edo kezka-uneetan nabaritzen dugu, eta egoera zailetan arreta jarri eta hobeto erreakzionatzeko balio digu.

Egoera batzuetan, baliteke antsietatea etengabe sentitzea eta tentsioa eta blokeoa gehiegizkoak izatea. Orduan bihurtzen da arazo; izan ere, horrek bizitzarekin jarraitzea zailtzen dizu eta sentsazio desatseginak sortzen dizkizu.

Horrela sentitzen bazara, gomendio hauei jarraitu ahal diezu:

• Ez utzi antsietatea areagotzen. Txertatu aldaketa txikiak zure bizimoduan eta zaindu ariketa fisikoa, elikadura eta loa.
• Ez egin dena aldi berean. Geure buruari ezartzen dizkiogun zereginak pilatzeak eta presaka ibiltzeak antsietatea areagotzen dute. Ezarri lehentasunak eta antola zaitez.
• Erlaxa zaitez. Hona hemen erlaxatzeko modu erraz bat: eserita edo etzanda zaudela, itxi begiak eta arnastu minutu batzuez. Hartu arnasa modu kontzientean segundo batzuez; eutsi arnasari 5 segundo zenbatuta, eta bota ezazu denbora bikoitzean.
• Hartu ohitura erlaxatzen zaituen jarduera bat egiteko egunero ordu erdiz (maskotarekin jolastea, musika entzutea...).

Frogatu da erlaxazio-teknikak eraginkorrak direla aktibazio fisiologikoa eta antsietatea murrizteko. Beste edozein trebetasunen moduan ikas daitezke. Entrenamendua beharrezkoa da, eta entrenamenduari esker hobetzen da teknika: zenbat eta gehiago praktikatu, hainbat eta onura handiagoak. Egin erlaxazio-ariketak egunero.

• Muskuluen erlaxazioa

• Irudimen-erlaxazioa

Mindfulnessa edo erabateko arreta adimenaren trebetasun bat da, arreta oraingo unera nahita ekartzean eta esperientzia onartzean datzana. Haren praktika mundu osoan hedatzen ari da, modu kontzienteagoan hautemateko, sentitzeko eta izateko bide gisa.

Norbera esperientziara zabaltzeko gonbidapena da, hura aldatzen saiatu gabe. Ez da erlaxazio-teknika bat, baizik eta gertatzen ari denaren bila joatea, epaiketarik egin gabe eta oraingo unea onartuta. Hurrengo ariketen bidez, "oraingo unean egoten" praktika dezakezu.

• 3 minutuko arnasketa-saioa

• Arnasketa bidezko meditazioa

• Gorputz-eskanerraren ariketa

Kezka onuragarria izan daiteke baldin eta arazoak konpontzen laguntzen badigu eta mobilizatzen bagaitu (adibidez, sukarra daukagunean gaiari buruz galdetzea). Kaltegarria izan daiteke, halaber, etengabe inbaditu eta blokeatzen bagaitu (adibidez, gure egoera ekonomikoak egonezina sortu arren, ez badugu ezer egiten irtenbiderik sortzeko).

Batzuetan, zaila da kezkak maneiatzea. Abiapuntu ona da kezka errealak eta ez-errealak bereiztea.

Zer kezka mota den jakiteko, erantzun honako galdera hauei:

• Benetako frogarik ba al dut berehalakoa dela esateko?
• Existitzen ez den zerbaitez kezkatzen ari al naiz?
• Etorkizunean gertatuko al da?
• Beste noizbait ebatzi al dut?
• Gaur egun modu berean ebatzi ahalko nuke?

Errealak ez diren kezkak eta aldatu ezin diren kezkak maneiatzeko, deskargatu erantsitako dokumentua.

Nola maneia ditzaket kezkak?

Hurrengo bideoan, gai honi buruzko informazio gehiago lortu ahalko duzu:

Kezken maneiua - Youtube

Kezken maneiua

Arazoak bizitzaren parte dira. Normalean, erabaki eta ekintzen bidez konpondu behar dira. Baliteke guretzat konplexua izatea erabakiak hartzea; edo, beharbada, egoera zail baten aurrean gaude.

Sarritan, arazoek zuzenean eragiten diote gure ongizate emozionalari, eta estresa, antsietatea, sufrimendua eta larritasuna dakarzkigute. Ondorioz, arazoak konpontzeko dugun gaitasunak okerrera egiten du. Emozioek irtenbidea erraztu edo eragozten dute, eta horregatik da beharrezkoa nork bere erantzun emozionalak ezagutu eta kontrolatzea.

Batzuetan, oztopo hauek aurkitzen ditugu arazoak ebaztean:

• Inpultsibotasuna eta presa.
• Akatsak egiteko beldurra.
• Erabakiak edo konponbideen bilaketa atzeratzea.
• Gure esku ez dagoena konpontzen saiatzea.
• Gure erreakzio emozionalak kontuan ez hartzea.

Hurrengo dokumentuan, arazoak konpontzeko teknika nola aplikatu azaltzen da. Prozesuak hainbat fase ditu, eta arazoak identifikatzen eta irtenbideak bilatzen lagunduko dizu. Baliagarria egingo zaizu gogoetak idazten joatea. Deskargatu dokumentua hemen:

Arazoak konpontzeko teknika

Hurrengo bideoan, gai honi buruzko informazioa aurkituko duzu:

Arazoak konpontzea - Youtube

Arazoak konpontzea