CSUR Helduen uretrako kirurgia berreraikitzaile konplexua

Zer da helduen uretrako kirurgia berreraikitzaile konplexua?

Gurutzetako Ospitaleko Kirurgia Berreraikitzaileko Unitatea gizonezko zein emakumezkoen uretrako patologia konplexua era integralean artatzen espezializatuta dago, eta gertaera kliniko oso heterogeneoak biltzen ditu, sintomatologia desberdinekin.

Patologia horien berrerortze-tasa handiak eta bizi-kalitatean duten eraginak — mikzioan, kontinentzian, sexu-funtzioan eta ongizate psikosozialean eragiten dute — ezinbesteko egiten dute zentro espezializatuetan artatzea. Eskarmentuak eta supraespezializazioak aukera ematen dute emaitza funtzionalak optimizatzeko, konplikazioak murrizteko eta asistentziaren eraginkortasuna hobetzeko, kontsultak, esku-hartze berriak eta osasun-kostuak murriztuz.

Unitateak kausa anitzetik eratorritako patologia uretral konplexua artatzen du, besteak beste:

• Kirurgia osteko estenosi uretralak, uretra, prostata edo maskuri-lepoko ebakuntzen ondoriozkoak, huts egindako kirurgia errepikatuak barne.
• Gaixotasun inflamatorio kronikoei lotutako estenosia, liken esklerosoa adibidez, segmentu laburretan edo uretra osoan eragina izan dezaketenak; edo genitaletan eragina duten beste gaixotasun sistemiko batzuk.
• Aurretiko kirurgia berreraikitzailearen sekuelak, hala nola hipospadien kirurgia okerra, osatu gabeko bi alditan berreraikitako uretrak, mentu autologoak edo emaitza funtzional txarra duten zintzilikarioak.
• Trauma-ondoko lesio uretralak, uretra-kaboak bereizita, mintz-uretra erasanda, lotutako inkontinentzia edo prozedura konplexuen beharra, hala nola osteotomiak edo zintzilikario handiak.
• Erradioterapiaren ondoriozko estenosia eta fistulak, eboluzio luzekoak edo latzak.
• Lesio iatrogenikoak, inguruko organoen kirurgia bitartean, hala nola bagina edo ondestea, fistula uretro-besikalak, uretro-baginalak edo uretro-ondesteak baldintzatzen dituztenak.
• Beste kirurgia urologiko batzuen konplikazio eta ondorio funtzionalak, prostatako minbiziaren tratamendu erradikalaren sekuelak barne; batzuetan, esfinter artifizialak jarri behar dira inkontinentziarako, edo zakil-protesiak erekzioaren disfuntziorako.
• Huts egindako kirurgia neo-uretretan, generoa berresteko kirurgia-kasuak barne.
• Dibertikuluekin, litiasi uretralekin edo neomeato perinealekin lotutako estenosia.
• Goiko gernu-bidearen kirurgia berreraikitzailea (robotikoa edo irekia).

Kirurgia horiek egiteko CSURen aitorpena beharretik sortu da, hain zuzen ere, tratamendua uretrako kirurgian eta kirurgia protesikoan trebatutako diziplina anitzeko talde baten esku uzteko beharretik, mentuak eta zintzilikarioak maneiatzen esperientzia handikoa eta teknika kirurgiko askoren jakitun, kasu bakoitzaren arabera aplikatu ahal izateko.

Irakaskuntza

Unitatean garrantzi handia ematen diogu asistentzia-jarduera irakaskuntzarekin eta ikerketarekin integratzeari.

Irakaskuntzaren arloan, Urologia Zerbitzuan Euskal Herriko Unibertsitateko (EHU) Medikuntza eta Erizaintza Fakultateko irakasleak diren profesionalak ditugu, patologia horri buruzko edukiak ematen dituztenak.

Gainera:

• Espezialisten prestakuntzan aktiboki parte hartzen dugu, espezialitateko urte bakoitzeko (5 urte) 2 egoiliar (BAME) ditugulako.
• Beste ospitale batzuetatik etorritako errotazioko medikuak hartzen ditugu, uretrako patologia BAME prestakuntza osatzeko.
• Estatuko eta eskualdeko elkarte zientifikoek antolatutako ikastaro, biltzar eta masterretan parte hartu ohi dugu hizlari gisa.
• Euskal Urologia Elkartean eta Espainiako Urologia Elkartean aktiboki parte hartzen dugu.
• Uretrako patologiari buruzko prestakuntza-ikastaro espezifikoak antolatzen ditugu egoiliarrentzat.

Ikerkuntza

Estenosi uretralerako stent uretral biodegradagarriari (Polimerbio) buruzko zentroen arteko azterketa batean parte hartzen dugu, ZE-2022/00021 – ITEAS – Ikerketa TErapia AvanzadaS proiektuan, konpondu gabeko behar medikoak konpontzeko.

ERN eUROGENeko kide gara. Sare hori mugaz gaindikoa da, eta erreferentziazko Europako ospitaleak biltzen ditu, gaixotasun eta gaitz arraroei, prebalentzia txikikoei eta gaixotasun konplexuei aurre egiteko, asistentzia sanitario oso espezializatua eskainiz, gure kasuan, gaixotasun urogenital arraroei dagokienez.

Ikerketak egiten ditugu gure emaitzetan oinarrituta, eta lan horiek urtero argitaratzen ditugu estatu mailako biltzarretan, patologia horiek dituen pazienteak gure ikerlan guztien erdigunean jarriz.

FAQ/Ohiko galderak